سيادة..طالعين نفر واحد سيادة!!!

باعتقادي ان العراق في التأريخ السياسي الحديث،كان اكثر شيء مقلق ومنتهك بالنسبة له هو موضوع (السيادة) ، اللهم الا فترة عبد الكريم قاسم رحمه الله حسبما قرأت..
ففي فترة اخو هدلى (جرذ العوجة) على سبيل المثال لا الحصر، كثرت لدينا خطوط الطول والعرض، والمناطق المحضورة، وفرق التفتيش تصول وتجول في البلاد حتى وصلت تلك الفرق الى غرفة نوم العينتين !!!!!
واوضح نسخة لفقدان السيادة هو مايحصل لدينا الآن، بحيث احنا ماندري شجاي يصير لافي ارضنا ولافي سمائنا ولافي مياهنا….
قواعد عسكرية تبنى في ارضنا، طائرات تجوب سمائنا، زوارق تسبح في مياهنا، وبدون علمنا وموافقتنا!!!
ناهيك عما يحدث في شمالنا العزيز، الذي اصبح وكرا للموساد!!!! (بختي بضبط الله، هاي مامتأكد منها) 🤣
ومع كل ماتقدم سمعت :
ان مجلس الوزراء منطي عطلة من( 30) ايلول الى (3) تشرين الاول، بمناسبة انتقال (السيادة) او ايام (السيادة)!!!!!
الحصول على السيادة، او انتقال السيادة امر مهم بالنسبة للدول، وهو حق دستور وعالمي، ويمثل استقلالية البلاد عن اي سلطة خارجية.
#-لكن اعتقد ان الأمر لدينا مختلف نوعا ما
(فأنك عندما تؤمر وتستجيب خلافا لمصلحتك الوطنية، فهذا امر لاينسجم مع السيادة الوطنية.)
يعني معقولة ورى هذا التأريخ، راح نعرف شراح يصير بالشمال، مثلا، مثلا!!!!
لو نعرف شراح يصير بالصحراء الغربية، لو بصحراء النجف، او بصحراء السماوة، مثلا، مثلا!!
يعني معقولة راح نعرف، شراح يصير بسمائنا، مسيّرات، اقمار صناعية، صحون طائرة، مثلا، مثلا!!!!!!
نأمل ذلك…
طبعا الموظفات والموظفين، يموتون على العطلة، سواء تحققت السيادة ام لم تتحقق.!!!
#- هذا يگولون فد يوم فرنسي تراهن وي عراقي، الفرنسي گال :
احنا عدنا المناسبات الوطنية والاحتفالات والعطل اكثر منكم!
العراقي گاله : مستحيل!!!
المهم تراهنوا على ان يضرب احدهم الآخر، على رأسه بنعال اسفنج (اجلكم الله) على عدد المناسبات الوطنية والعطل الرسمية.
الفرنسي ضرب العراقي، يمكن ثلث مرات!!!
بعدين العراقي تناوش النعال اول ماصفط الفرنسي بسبع نعالات (صلي) على راسه.
الفرنسي گله : هاي شنو؟!!
العراقي : هذا اسبوع قادسية صدام!!!!!
بعدين هم صلخة بسبع نعالات صلي.
الفرنسي :هاي شنو؟!!!
العراقي گاله : مددناه اسبوع ثاني…
يعني الفرنسي اكله (14) نعال بمناسبة وحدة 🤣
هم زين النعال اسفنج!!!

سخرية سوداء