شمّسوين من عَمْلّة

احيانا: تكون اعمال الانسان سبب مباشر لما يطرأ عليه في واقعة الاجتماعي…
ظهر الفساد في البر والبحر بما كسبت ايدي الناس…..
واخرى: ينظر الى الدنيا باعتبار طبيعة تكوينها كجزء من النظام الكوني الطبيعي، على انها دار بلاء، وان المؤمن فيها مبتلى!!لايحقق فيها طموحاته وأمآنيه، ويذهب منها وهو يشعر ان هناك اشياء لم تكتمل بعدُ.
ومرة ثالثة : كيفما تكونوا يولى عليكم،
ومرة رابعة : ربما نحن نعيش آثار دعاء الاولياء والصالحين علينا (اجعلهم طرائق قددا، ولاترضي الولاة عنهم ابدا) وهكذا….
وكل من هذه الاحتمالات تصح في جانب، وتخضع للنقاش في جانب آخر
ونحن في فلك هذه الاحتمالات ندور،
نطمئن لتفسير معين منها، فنقول نحن على خير، ونكون مصداق لأخرى، فينطبق علينا (من المغضوب عليهم)، وهكذا دواليك!!!
وحدها هي التفسيرات الدينية سواء كانت ايجابية او سلبية هي التي يُركن الى نتائجها!!!
يسولفون اهلي يگولون : طفرنا بليلة ظلماء من بطش الاقطاع في الجنوب بسنة ١٩٥٧، وسكنا في بغداد! لان شيوخ الاقطاع وجهاز الامن الخاص التابع لهم (الحوشية)، كانوا يكضون الفلاح ويسمطون ابو ابوه بالخيزرانة!!!
طبعا الملكية كانت داعم مباشر لذلك النظام!!!!!
في ١٩٦٣ حلت فترة الظلام الدامس(هندس) على العراق (فترة البعث والقائد الضرورة)، سجون، اعتقالات، تصفيات، حروب(احنا مشينا، مشينا، للحرب، عاشگ يدافع من اجل محبوبتة)!!!!!، حصار اقتصادي، استغله البعث للمتاجرة بموت الاطفال… (اللي الله منطيه بوقتها كان يشرب مزّبن)!!!!!!! وكانت الاصوات تصدح بحب القائد رغم الطيحان حظ (اجلكم الله) :
احنا الشعب وانت..
حبيب منا وبينا…
عشت ويانا وتعرف…
شكرهنا وحبينا…
بينا تباهي الدنيا
وبيك احنا تباهينا
كل مصباح ابشارة
تتلالى ويجبينك والله!!!!!!
بعد كل ذلك ونحن في آخر گَصة استلمونا الاخوة الاعداء،وصارت من بخت البلوكرات والفانشستات!!!! ومانعرف اشلون تخلص!!!!!!
#-النهايات السائبة المفتوحة للأشياء، ربما لاندرك تفسيرها الحقيقي في الحياة الدنيا،لذلك ترحل الى العالم الآخر ونحن هناك،( لو فوگ هذا الظيم، لو تشملنا رحمته الواسعة) !!!
#- يگولون هذا واحد يخاف من الموت كلش، راح گعد يم المغيسل، كلما تجي اجنازة، يسأل، عمي هذا الميت اشلون مات؟!!!
مره واحد، گاله، هذا دعمته سياره ومات، ومرة، گلولة هذا نتلته الكهرباء ومات، ومرة گالوله هذا خطيه غرگ ومات!!!!
گال الحمد لله اني ذني كلهن ما اسويهن!!!!!
اخير اجنازة اجت، گالهم عمي هذا المرحوم اشلون مات؟!!!!
گالوله : والله كلشي مابيه، صبح الصبح لگيناه ميت!!!!!
گال : هذا الكلان تبن!!!!!!! 🤣
والعاقبة للمتقين

سخرية سوداء